Dubinin Andrey

Андрэй Барысавіч Дубінін нарадзіўся 9 чэрвеня 1963 г. у Мінску. 1981-1987 гг. – навучанне ў Беларускім дзяржаўным тэатральна-мастацкім інстытуце (зараз Беларуская дзяржаўная акадэмія мастацтваў) на аддзяленні «станковы жывапіс», спецыяльнасць мастак-жывапісец, педагог. 1988-1990 гг., 1996-1999 гг. працаваў мастаком-рэстаўратарам у Спаса-Прэабражэнскай царкве XII ст. Ефрасіннеўскага манастыра ў г. Полацку, у касцёле Св. Станіслава XVII ст. у г. Магілёве, у Свята-Петрапаўлаўскім саборы XVII ст. у г. Мінске, у сядзібе Прушынскіх XVII-XIX стст. у Лошыцы. 1990 г. – вывучэнне тэарэтычнага курсу ва Ўсесаюзным інстытуце падвышэння кваліфікацыі працаўнікоў культуры Міністэрства культуры СССР (кафедра метадалогіі і тэхналогіі рэстаўрацыі) у г.Масква. 1990-1998 гг.- выкладчык манументальна-дэкаратыўнага мастацтва мастацкага аддзялення ў Рэспубліканскім каледжы мастацтваў (жывапіс, малюнак, кампазіцыя). Прысвоена першая кваліфікацыйная катэгорыя. З 1996 па 2004 г.г. выкладаў у Беларускай дзяржаўнай акадэміі мастацтваў на аддзяленні Дэкаратыўна-прыкладнога мастацтва (спецыяльнасці кераміка, мастацкі метал і шкло). Пачынаючы з 2001 года перыядычна творча працуе ў Італіі ці ў Беларусі, выставляючы свае праекты і асобныя творы ў Беларусі, Італіі, Германіі. Яго карціны набылі яму вызнанне і важныя замовы ў краіне, падараваўшай свету пляяду геніяльных мастакоў, і разумеючай і любячай мастацтва. За апошнія гады ў Італіі адбыліся тры персанальныя выставы мастака, дзве з іх пад патранажам і пры ўдзеле пасольства Рэспублікі Беларусь. У 2008 годзе Андрэй Дубінін быў ушанаваны дыпломам «Біенале міжнароднага мастацтва 2008» у Рыме (удзельнічалі аўтары з 28 краін). У гэтым жа, 2008 г., мастак быў запрошаны распісваць адноўлены пасля землятрусу храм у Cava dei Tirreni -- горадзе-пабраціме беларускага Міра, адначасова выконваючы маштабную серыю з 12 карцін, прысвечаную айцам-заснавальнікам аднога з старэйшых і важнейшых абатстваў – Badia di Cava.